Logo
sitemap
sitemap
sitemap

قصيدة الغربة




يا علي متى على الله ألبس الثوب السعودي
والبس شماغي واميل فوق مرزامه عقالي

واترك البدلة مع الغربة واختم بالحدودي
واقطع الهاجوس من قلب(ن) سهر سود الليالي

قلبي اللي مثل غزه والمفَارَقْ  كاليهودي
عذبه بالذكريات اللي برت بالحيل حالي

يا علي ياوجد حالي وجد من فج النفودي
تاه فيها والظما يقطع مديات الجمالي

ولا معه لا من عوين ولا صديق(ن) ياوجودي
ما معه غير الذراري يَزعجون الصوت عالي

ويوم راح يدور الما في عذيات العدودي
وعاد به جر الونين بموت غالين العيالي

للرياض اللي غلاها وسط وجداني يزودي
ما نقص رغم المسافه وما نقص رغم انشغالي

والله ان  اغبارها اللي تسثيره كل نودي
خير من زيلامسي واجبال روكي والتلالي

لانها دار(ن) ربتني واحضتني بالعضودي
لين ما شبيت وأضحى ذكرنا بين الرجالي

ولأنها دار الحرم وابها مقام أمي وعودي
والرجال اللي لهم تاريخ بأيام (ن) خوالي

دمعة امي ياعلي لا ما استفاضت بالخدودي
قطعت قلبي ونفسي عاجزه يابري حالي

صابر(ن) لجل الوطن والحاكم اللي لي سنودي   
والمسافه يا علي قطاعة احبال الوصالي

قالوا اني رحت لامريكا وفي خير(ن) وزودي
ما دروا عن غربة (ن) تكوي  معاليق المصالي

والله اني لو  بروضة مزهره من كل عودي
في بلاد(ن) غير دار المملكة ما نيب سالي

وخيمة (ن) في قفرة (ن) في موطني وانا سعودي
خير من قصر (ن ) بدار(ن) مالنا فيها مجالي
 
د.مبارك بن مشيط.
مونتانا - امريكا
٢٠١٤

go up
جميع الحقوق محفوظة، انطلق للبعثة 2016 - 2018 ©