Logo
sitemap
sitemap
sitemap

قصيدة صور الامطار بالمملكة

عندما كنت بولاية مونتانا وكان البعض يرسل صور الأمطار بالمملكة ازداد الشوق كثيرا



ياعبيد تدري ويش يبحث خفا الحال
لا صرت متغرب ودارك مطيره
وقاموا هل الكشتات من كل جوال
ترسل صور كشتاتها بكل ديره
هذا يصور خايع (ن)  تو ما سال
وهذا بشعب(ن) يبهجك في مسيره
وهذا يسوق امن أشقر البن فنجال
في مجلس(ن) ضوه غدت مستنيره
افرح لهم والدمع بالخد همال
والعين تصبح من ولهّا سهيره
آله على داري ليا خلت  مخيال
وأشتاق له شوق العشير ال عشيره
لا مال قرص الشمس وظلالها مال
رقيت لي رجم (ن) دروبه عسيره
اخيل داري واتوجد بموال
عسى صدى صوتي يواسي ضميره
وانا بدار ن تبعد آلاف لميال
والروح بين اطلال شبه الجزيره
مليت دار(ن) بردها يمحق الحال
برد(ن) يكسر هقوتي  زمهريره
ان جيت بخرج كن باقدامي عقال
وكن المفاصل من  جمدها  كسيره
اصبر عسى ربي يحقق لي امال
وادعي عسى التوفيق مسك المسيره

د.مبارك بن مشيط
مونتانا - امريكا
٢٠١٥/٣/٢٤

go up
جميع الحقوق محفوظة، انطلق للبعثة 2016 - 2018 ©